Garraio sailak udan ekingo die Lasarte Oriako geltokiko nasa eta markesina eraberritzeko lanei

Argitalpen-data: 

Garraio sailak udan hasiko ditu Lasarte Oriako topoaren geltokiko nasa eta markesina eraberritzeko lanak. Obra zibilaren aurrekontua 471.675 eurokoa da (BEZik gabe), eta egikaritze-epea 4 hilabetekoa. Euskal Trenbide Sareko kontratazio-organoak eskaintzarik onena onartu, Zamakoa S.A.-k aurkeztutakoa, eta dokumentazioa egiaztatu ondoren, datozen egunetan behin betiko esleipena egingo da. 

Iñaki Arriolak zuzentzen duen Garraio Sailaren esku dagoen ETS erakunde publikoaren proiektuaren arabera, Lasarte-Oriako nasa eta markesina egokitzeko lanen arrazoi nagusiak, nasan EMU 950/900 unitateen plataformarekin dauden kota-aldeak eta markesinan iragazketak egotea dira, dagoeneko materiala zahartuta eta hondatuta dagoelako. 

Plegu honetan lizitatzen diren lanen artean hauek daude: nasa eraistea, zimendatzea eta zolatzea, markesina eta bizi-lerroa instalatzea, altzairu herdoilgaitzezko altzariak eta metalezko elementuak hornitzea eta jartzea, urak biltzeko saneamendua egitea, egin gabe dauden elementuetako led seinaleak hornitzea eta instalatzea, bandak, gelditzeko lerroak eta metalezko elementuak margotzea, led argiteria instalatzea eta azkenik, amaierako garbiketa egitea eta kutxetak egokitzea. 

Era berean, bidaiarien sarbidea ez da inoiz etengo, ezta trenbideko trafikoaren ohiko garapena ere; beraz, jarraibide horiekin bateraezinak diren lanak gauez egin beharko dira. 

Esku-hartze honetan, Euskadiko trenbide sareko geltokiak genero-ikuspegiarekin diseinatzeko Liburu Zurian jasotako irizpideak sartzen dira. Gida horren helburua trenbidearen erabiltzaile guztiei, beren adin-, genero- edo gaitasun-baldintzak batzuk edo besteak izanda ere, espazioak eta zerbitzuak modu seguruan eta erosoan erabiltzeko soluzioak eskaintzea da.