5. Linea

Intereseko bestelako informazioa

Proiektua hiru tartetan dago banatuta, eta laugarren tarte bat gehituko zaio, Euskotrenek Usansolon duen linearekin lotura. Lehenengoa, Sarratu-Aperribai, 1.540 metro da luze eta Matiko-Etxebarri lineako desbideraketa gisa sortu da, aire zabalean Etxebarriko geltokiaren ondoren. 3. linearen jarraipena izango da, eta, beraz, 5. linea ere Euskotrenek operatuko du, eta hark hartuko ditu bere gain eragiketaren gastuak. 

Metro batzuk aurrerago, Sarratuko (Basauri) geltoki intermodala eraikiko da, gainazalean, baina estalita, Euskotrenen eta Metro Bilbaoren arteko truke-terminal gisa planteatuta. Hortik aurrera, trazadura lurpean joango da osorik. Azpitik gurutzatuko du Ibaizabal ibaia, Nerbioi ibaiarekin bat egiten duen lekuaren parean. 

Nasa erdian duen Aperribaiko geltokia cut & cover izenez ezagutzen den prozeduraren bidez eraikiko da, hau da, aire zabalean hondeatuko da, pantailak jarriko dira eta berriro estaliko da.

Aperribai-Galdakao bigarren tartea 2.800 metro da luze, eta Galdakao erdialdean amaitzen da. Ostalaritza eskolaren parean egongo den Bengoetxeko geltokia cut & cover sistemaren bidez hondeatuko da, baina kasu horretan nasak alboetan izango ditu. Ondoren, meategiko tunelak jarraituko du Galdakaoko Agirre plazaraino (Plaza Gorria esaten zaio), eta han geltoki bat eraikiko da haitzuloan, Bilboko metrokoen motakoa. Terminalak bi sarbide-kanoi izango ditu, bata Bernart Etxepare kalean eta bestea Euskadi eta Juan Bautista Uriarte kaleen arteko bidegurutzean.

Hirugarren tartea, Galdakao-Ospitalea, 1.930 metro da luze, eta tunelean joango da Galdakao-Usansoloko Ospitaleko geltokia baino pixka bat aurreragora arte. Geltoki hori ere haitzulo-motakoa izango da. Terminalak sarbide zuzena izango du osasun-zentrotik, igogailuen bidez.

Laugarrena Busturialdetik eta Durangaldetik datorren Euskotrenen linearekin lotuko da, Ospitaleko geltoki berritik abiatuta. Gaur egun tarte horren informazio-azterlana idazten ari da.