Eusko Jaurlaritzako Lurralde Plangintza, Etxebizitza eta Garraio Sailaren esku dagoen Euskal Trenbide Sarea erakunde publikoko kontratazio-mahaiak, lizitaziora atera ditu Amorebietan dagoen Bilbo-Donostia trenbideko Eubako trenbide pasagunea kentzeko lanak, 4,6 milioi euroren truke. Lanak egiteko hasiera batean aurreikusten den epea, zubibide bat eraikitzea barne, 15 hilabetekoa da.
Jarduketa hori, trafiko-intentsitate handia jasaten duten trenbide pasaguneak kentzeko ETS gauzatzen ari den politikaren barruan dago. Gaur egun, Euskal Trenbide Sareak 108 trenbide-pasagune ditu, horietatik 71 Bizkaian eta 37 Gipuzkoan. 2010-2021 epean 51 trenbide-pasagune kendu dira, horietatik 16 Gipuzkoan eta Bizkaian 35. Azken hamar urteetan, Eusko Jaurlaritzak ia 1.000 milioi euro inbertitu ditu bere eskumeneko trenbide-sarea hobetzeko, azpiegiturari dagokionez.
Amorebietako pasabidea Euba eta Bernagoitia auzoak lotzen dituen BI-4337 errepidean dago. Puntu beltz hori kentzeko eta, horrela, erabiltzaileen segurtasuna hobetzeko, erakunde publikoak, adar berriak lehendik dagoen errepidearekin duen lotura-puntua kontuan izanda trenbideak gainetik zeharkatzeko aztertu dituen bidezubiaren hiru aukeretatik onena hautatu du.
Aukeratutako zubiaren trazadurak % 6tik beherako maldak eta 50 metroko kurbadura-erradioei eusteko beharrari erantzuten dio. 20 metroko baoetan banatutako 225 metroko luzera du eta trenbidearen gainean dagoen erdiko baoa 25 metrokoa izango da. Plataformak 12 metroko zabalera du, autoentzako 3,85 metroko bi erreitan, 0,50eko bazterbideetan eta oinezkoentzako 2 metroko espaloian banatuta. Lurraren gaineko altuera 4 eta 7 metro artekoa da.
Zubibiderako aukeratu den tipologia zubi integralekoa da, eta hormigoizko taula eta hormigoiz betetako metalezko pila tubularrak ditu. Hautu hori egiteko arrazoiak eraikuntza-kostu egokia, mantentze-lan txikiak eta ingurunearekiko integrazioa izan dira. Zubibidea zubi integral gisa pentsatzeak, egiturari dagokionez eraginkorrak diren eta esfortzu batez ere bertikalak zimenduetara eramango dituzten pila lerdenak diseinatzeko aukera ematen du, eraikuntza-proiektuak jasotzen duenez.
Egituraren ondoan aparkatzeko gune bat eraikiko da, inguruan dagoen parke baten ondoan, eta lehendik dagoen errepidearekiko lotura berrantolatu egingo da.
Trenbide pasagunea kentzea ez da izan ETSk azken hilabeteetan Amorebietan gauzatu duen jarduketa bakarra. Joan den abenduan jarri zen martxan herri horretako geraleku berria, urtebete baino gehiagoko lanen eta milioi bat euroko inbertsioaren ondoren. Nasa zaharra eraitsi zen, markesina eta geltokiko buruaren etxola barne. Nasa berriak 101 metroko luzera du guztira, eta horietatik 60 metro altzairu herdoilgaitzez eta beira ijeztu epelez egindako markesina batekin estalita geratzen dira.

